يا مسلسل راح تشوف بشهر رمضان !!!؟
سكوت مع ابتسامة 😊
متريد تباوع مسلسلات !!! چا انت شگد متخلف … عمي باوع وتونس …. صدگ چذب هذه العقلية الشايلها …
اني مو بمحل يسمح لي اگلك باوع او لتباوع مسلسلات ولا الي حق بذلك بس اريد اگلك مع توفر الانترنيت كل شيء صار متاح وبإمكانك ترجع للمسلسل مالتك بأي وقت تريد وبدون فلوس لأن الفلوس مدفوعة مسبقاً!
أما ساعات وأيام شهر رمضان المبارك ما متاحه الا مرة بالسنة وما معلوم تنعاد علينه لو لا فالأفضل تخليلك جدول تشوف بيه شلون راح تقضي هذه الأيام المباركة تعال وياي خلينه نفكر بصوت عالي.
🔹️ قراءة جزء من القرآن الكريم من 20 الى 30 دقيقة فقط واذا تريد تتأمل بآيات القران الكريم وتعرف معانيها هاي بعد إنت وشطارتك واكو بدل التفسير تفاسير وموجوده على النت.
🔹️ قراءة ادعية شهر رمضان المبارك من دعاء الافتتاح والبهاء ودعاء ابو حمزة الثمالي وغيرها من الادعية متاخذ منك غير دقائق معدودة (باستثناء دعاء ابي حمزة الثمالي فله الحصة الكبرى من الوقت لاحتوائه على قدر كبير من المعارف) واذا حبيت تشوف معاني الأدعية راح تلگالها بعشرات الشروح ما بين كتب ومحاضرات وموجودة بالنت.
🔹️ قراءة عدد من الكتب حسب تخصصك او اهتمامك يمكن تفيدك بحياتك واغلب الكتب الي تبحث عنها تلگاها بالمكتبات العامة او بمكتبات العتبات المقدسة او بالنت.
🔹️ اذا مالك خلگ تقره كتب اسمعها لان توجد المئات من الكتب الصوتية او اسمع لك محاضرة دينية او تربوية او تعليمية حسب توجهك ورغبتك وتلگاهن بالآلاف بالنت.
🔹️ اذا تريد روح للحضره او للجامع وشوف الگاعدين يسمعون الدعاء او المحاضرة وإسألهم ليش جايين واستمتع بأجوبتهم.
🔹️ لتروح زايد بالأكل وبعدين تقضي وقتك لو نايم لو تشرب سفن حتى تصرف الي أكلته تره الرشاقة صارت موضة وصحتك مو بلاش.
🔹️ ساعد امك او اختك او زوجتك او بنتك بالفطور والسحور وغسل المواعين تره مو عيب والنبي صلى الله عليه وآله بعظمته يساعد اهل بيته واكيد هذه من الصفات الي تدعو للتحضر.
اغلب الي ذكرتهن بدون فلوس واكو غيرهن هواي ولكن هذه الي ببالي بهذه العجالة وانت بكيفك وصدگني اني مو ضد المسلسلات بقدر ما اريدك تستثمر هذه الاوقات الي مستحيل تتكرر الا بالسنة مرة وما معلوم احنه عايشين السنة الثانية لو لا.
